03.11.2025
ცირკულარული ეკონომიკა და მწვანე ინიციატივები - „თეგეტა გრინ პლანეტი“ ლისაბონში საერთაშორისო კონფერენციაზე წარსდგა
გარემოსდაცვითი ინიციატივები თანამედროვე სამყაროში ეკონომიკური და სოციალური განვითარების მნიშვნელოვან ნაწილად იქცა. მდგრადი განვითარება აღარ არის მხოლოდ იდეა - ის გახდა რეალური პროცესი, რომელიც ახალ შესაძლებლობებს ქმნის და გარემოზე ზრუნვას ეკონომიკურ სარგებელთან აკავშირებს.
ამ გლობალური ტრანსფორმაციის ფონზე, „თეგეტა ჰოლდინგთან“ დაკავშირებული მწარმოებლის გაფართოებული ვალდებულების ორგანიზაცია (PRO) „თეგეტა გრინ პლანეტი“ ლისაბონში, ერთ-ერთ პრესტიჟულ საერთაშორისო კონფერენციაზე - RAR2025 წარდგა, სადაც ცირკულარული ეკონომიკისა და მდგრადი განვითარების საკითხები განიხილეს. განსაკუთრებული ყურადღება დაეთმო საბურავების გადამუშავების შედეგად მიღებული რეზინის ასფალტში შერევის საკითხს, რომელზეც მსოფლიოს სხვადასხვა ქვეყნიდან მოწვეულმა მწარმოებლებმა და აკადემიური სფეროს წარმომადგენლებმა იმსჯელეს და წარადგინეს როგორც მათ მიერ დანერგილი ინოვაციური მიდგომები, ისე უახლესი კვლევები რეზინით მოდიფიცირებული ასფალტის გამოყენების და მისი უპირატესობების შესახებ.
ღონისძიებაზე „თეგეტა გრინ პლანეტის“ აღმასრულებელმა დირექტორმა თემაზე Circular Industry in Motion პრეზენტაცია წარადგინა. შალვა ახვლედიანის გამოსვლამ საერთაშორისო მედიის ყურადღებაც მიიპყრო - სტატიები გამოქვეყნდა გამოცემებში The CEO Weekly და The Hudson Weekly.
შალვა ახვლედიანი, „თეგეტა გრინ პლანეტის“ აღმასრულებელი დირექტორი: „თეგეტა გრინ პლანეტის“ მონაწილეობა RAR2025-ზე მნიშვნელოვანი ეტაპია როგორც ქვეყნის, ასევე კომპანიის განვითარების გზაზე. ეს ღონისძიება ხელს უწყობს საქართველოში საბურავების ნარჩენების ცირკულარულ ეკონომიკაში ჩართვას თანამედროვე და ინოვაციური მიდგომებით. კერძოდ, რეციკლირებული რეზინის ასფალტში შერევა მნიშვნელოვნად აუმჯობესებს გზის საფარის ხარისხსა და თვისებებს. ასევე, თითქმის აორმაგებს მის გამძლეობას.
ამასთანავე, ფორუმში მონაწილეობა განსაკუთრებით მნიშვნელოვანი იყო კომპანიისთვის, რადგან RAR2025 ცირკულარული ეკონომიკისა და მდგრადი ინფრასტრუქტურის საერთაშორისო პლატფორმაა, რომელიც მოწინავე ქვეყნების გამოცდილებასა და საუკეთესო პრაქტიკებს აერთიანებს.
ღონისძიებაზე წარმოდგენილი იყო საქართველოს პრაქტიკული მიღწევები ნარჩენების მართვაში, ინოვაციური მიდგომები და პროცესები, რაც აჩვენებს, როგორ შეიძლება კერძო სექტორისა და სახელმწიფოს თანამშრომლობამ შექმნას მდგრადი, ეფექტური და ფუნქციონალური ეკონომიკური მოდელი“.
გამოყენებული საბურავები მსოფლიოში ერთ-ერთ ყველაზე რთულად სამართავ ნარჩენად ითვლება. მათი უკონტროლო დაგროვება ან უკანონო დაწვა მნიშვნელოვან ზიანს აყენებს ეკოსისტემას. თუმცა, „თეგეტა გრინ პლანეტის“, Wasteless-ისა და სხვა მწარმოებლის გაფართოებული ორგანიზაციების ჩართულობით, საქართველოში ეს პრობლემა შესაძლებლობად იქცა და ახალი ეკონომიკური მიმართულება შეიქმნა, ისტორიული პროექტის - საქართველოს პირველი ინდუსტრიული მასშტაბის საბურავების გადამამუშავებელი ქარხნის სახით, რომელიც 2026 წლის მესამე კვარტალში ამოქმედდება.
გადამამუშავებელი ქარხანა უახლესი ევროპული ტექნოლოგიებით აღიჭურვება და წელიწადში ათასობით ტონა საბურავის გადამუშავებას შეძლებს. მიღებული მასალები - ფოლადი, ტექსტილი და რეზინის გრანულატი კი გამოყენებული იქნება გზების მშენებლობაში, სპორტულ მოედნებსა და ინდუსტრიულ წარმოებაში.
„ჩვენ გადავწყვიტეთ, რომ საბურავის ისტორიას ახალი დასასრული ჰქონდეს. იქ, სადაც ადრე ნარჩენი იყო, ახლა შესაძლებლობა იბადება. ყოველი საბურავი, რომელსაც ვამუშავებთ, ნიშნავს დაბინძურების თავიდან აცილებას და ამავე დროს ახალი ღირებულების შექმნას. ლისაბონში დამსწრე აუდიტორიისთვის აღნიშნული ინიციატივა იქცა მაგალითად, თუ როგორ შეუძლია კერძო სექტორსა და სახელმწიფოს ერთად შექმნან ცირკულარული ეკონომიკის ფუნქციონალური მოდელი“, - აღნიშნავს შალვა ახვლედიანი.
გარემოსდაცვითი ცნობიერების ამაღლება „თეგეტა გრინ პლანეტის“ საქმიანობის განუყოფელი ნაწილია. კომპანია დღეს მდგრადი განვითარების ბიზნესმოდელს წარმოადგენს, რომელიც ინოვაციას, ტექნოლოგიასა და პასუხისმგებლიან მიდგომებს აერთიანებს.
კონფერენციაზე „თეგეტა გრინ პლანეტმა“ ნათლად წარმოაჩინა, რომ საქართველო არა მხოლოდ მიჰყვება გლობალურ სტანდარტებს, არამედ თავად ქმნის მდგრადი განვითარების მოდელს. კომპანიის ინიციატივები და ინოვაციური მიდგომები კი ქვეყანას შესაძლებლობას აძლევს, ცირკულარული ეკონომიკის სფეროში მნიშვნელოვანი გარდატეხა მოახდინოს და ახალი შესაძლებლობები გააჩინოს.
„თეგეტა გრინ პლანეტი“ „თეგეტა ჰოლდინგთან“ დაკავშირებული, არაკომერციული ორგანიზაციაა, რომელიც სპეციფიკური ნარჩენების მართვის ხელშეწყობისა და საავტომობილო ინდუსტრიაში ცირკულარული ეკონომიკის პრინციპების დანერგვის მიზნით შეიქმნა. კომპანია სპეციფიკური ნარჩენების - საბურავების, ზეთებისა და აკუმულატორების შეგროვებას, ტრანსპორტირებასა და გადამუშავებას უზრუნველყოფს. 2023 წლიდან დღემდე „თეგეტა გრინ პლანეტის“ ჩართულობით 4 000 ტონაზე მეტი ნარჩენი აკუმულატორი, 2 000 ტონამდე ნარჩენი ზეთი და 10 000 ტონაზე მეტი საბურავი შეგროვდა და ცირკულარული ეკონომიკის წესების შესაბამისად გადამუშავდა.