ზოგჯერ დიდი ცვლილებები დიდ ქალაქებში არ იწყება. ისინი ერთი ადამიანის გადაწყვეტილებიდან, ერთი იდეიდან და იმ სურვილიდან იბადება, რომ უკეთესი მომავლის შექმნა საკუთარ ადგილასაც შესაძლებელია.

თეგეტა გრინ პლანეტი მხარს უჭერს ადამიანებსა და ინიციატივებს, რომლებიც საზოგადოებისთვის ახალი შესაძლებლობების შექმნას ცდილობენ. სწორედ ასეთი ადამიანია დიანა სახურია, რომელიც ქალაქიდან სამეგრელოს სოფელ ოქტომბერში გადავიდა საცხოვრებლად და გადაწყვიტა, საკუთარი და შვილების მომავალი საკუთარ ქვეყანაში აეშენებინა.

დიანას წინაშე არჩევანი იდგა - წასულიყო ემიგრაციაში თუ დარჩენილიყო საქართველოში, შვილებთან ერთად და აქ, საკუთარ სოფელში, ახალი ცხოვრება დაეწყო. 

მან კი დარჩენა აირჩია.

საკუთარი სახლის ეზოში დიანამ შექმნა სივრცე, რომელიც დროთა განმავლობაში ადგილობრივი ქალებისა და ბავშვებისთვის მნიშვნელოვან შეხვედრისა და განვითარების ადგილად იქცა. აქ ისინი ერთმანეთს უზიარებენ გამოცდილებას, ეუფლებიან ახალ უნარებს, კითხულობენ, სწავლობენ და სხვადასხვა აქტივობაში მონაწილეობენ. სივრცის მთავარი იდეა კი ადამიანების გაერთიანება და მათთვის შესაძლებლობების შექმნაა.

თეგეტა გრინ პლანეტის გუნდი სოფელ ოქტომბერს ეწვია და დიანას მიერ შექმნილი სივრცე ადგილზე დაათვალიერა. დიანამ ჩვენთვის თავად გაიხსენა ამ იდეის შექმნის ისტორია, გაგვაცნო ადგილობრივი ქალები და ბავშვები და გვაჩვენა, როგორ იქცა ერთი ადამიანის გადაწყვეტილება საერთო საქმედ.

ჩვენთვის განსაკუთრებით მნიშვნელოვანი იყო იმ ადამიანებთან შეხვედრა, რომლებიც ამ სივრცით სარგებლობენ და ყოველდღიურად ქმნიან მის ისტორიას. მათი გამოცდილება კიდევ ერთხელ გვაჩვენებს, რომ ადგილობრივი ინიციატივების ძალა მხოლოდ კონკრეტული პროექტით არ შემოიფარგლება, ის ადამიანებს ერთმანეთთან აკავშირებს და მათ საკუთარ შესაძლებლობებში რწმენას უძლიერებს.

დიანას წამოწყების მხარდაჭერა თეგეტა გრინ პლანეტისთვის სოციალური პასუხისმგებლობის ნაწილია. გვჯერა, რომ საზოგადოებისთვის მნიშვნელოვანი ცვლილებების შექმნას ხშირად სწორედ ასეთი მცირე, მაგრამ გულწრფელი ინიციატივები იწყებს. ჩვენი მხარდაჭერის მიზანიც სწორედ ის არის, რომ ადამიანებს, რომლებიც საკუთარ თემში უკეთესი მომავლის შექმნას ცდილობენ, განვითარების შესაძლებლობა გავუზიაროთ.

სოფელ ოქტომბერში, დიანას სახლში, ეს ცვლილება უკვე დაწყებულია - ერთი ადამიანის არჩევნით, რომელიც ნელ-ნელა ბევრ ადამიანამდე მიდის.