თეგეტა აკადემიაში მსუბუქი ავტომობილის დიაგნოსტიკის კურსი თეგეტა გრინ პლანეტის პრეზენტაციით დაიწყო. შეხვედრას 17-დან 33 წლამდე ასაკის მონაწილეები დაესწრნენ, რომლებმაც პროფესიული მიმართულების შესწავლასთან ერთად ავტომობილებთან დაკავშირებული ნარჩენების მართვისა და გარემოსდაცვითი პასუხისმგებლობის შესახებაც მიიღეს ინფორმაცია.

შეხვედრის ფარგლებში თეგეტა გრინ პლანეტის დირექტორმა, შალვა ახვლედიანმა, მონაწილეებს ორგანიზაციის საქმიანობა, მიზნები და გაფართოებული მწარმოებლის ვალდებულების (მგვ) მნიშვნელობა გააცნო. საუბარი შეეხო იმასაც, თუ როგორ უკავშირდება ავტომობილების სფერო გარემოსდაცვით პასუხისმგებლობას და რატომ არის მნიშვნელოვანი ისეთი ნარჩენების, როგორიცაა გამოყენებული საბურავები, ნარჩენი ზეთები და აკუმულატორები, სწორად შეგროვება და მართვა.

შალვა ახვლედიანმა მონაწილეებს განუმარტა მგვ-ის პრინციპიც, რომლის მიხედვითაც პროდუქტის მწარმოებლებსა და იმპორტიორებს პროდუქტის მოხმარების შემდეგ წარმოქმნილი ნარჩენების მართვასთან დაკავშირებული პასუხისმგებლობა ეკისრებათ. თეგეტა გრინ პლანეტი, როგორც მგვ ორგანიზაცია, კომპანიებს ამ ვალდებულებების შესრულებაში ეხმარება და შესაბამისი ნარჩენების შეგროვებასა და მართვას უზრუნველყოფს.

პრეზენტაციის ერთ-ერთი მნიშვნელოვანი ნაწილი იყო საბურავების მართვის საკითხი. მონაწილეებმა გაიგეს, რა გზას გადის გამოყენებული საბურავი შეგროვებიდან გადამუშავებამდე და როგორ შეიძლება ნარჩენი ახალი რესურსის წყაროდ იქცეს.

შეხვედრაზე ასევე ისაუბრეს თეგეტას საბურავების გადამამუშავებელ ქარხანა RECSOL-ზე, რომელიც გამოყენებული საბურავების გადამუშავების მიმართულებით მნიშვნელოვანი ინფრასტრუქტურული პროექტია. ქარხანაში საბურავები გადამუშავდება და მიღებული მასალები სხვადასხვა დანიშნულებით შეიძლება გამოყენებულ იქნას, რაც ნარჩენის წრიული ეკონომიკის პრინციპებით მართვის შესაძლებლობას ქმნის.

თეგეტა გრინ პლანეტის საქმიანობის ერთ-ერთი მთავარი მიზანი სწორედ ისეთი სისტემის განვითარებაა, სადაც ნარჩენი საბოლოო დანიშნულებად გადაყრა კი არა, ახალი რესურსის დასაწყისია. ამისთვის მნიშვნელოვანია როგორც შესაბამისი ინფრასტრუქტურის არსებობა, ისე საზოგადოების ცნობიერების ამაღლება და ადამიანებისთვის ნარჩენის სწორად ჩაბარების შესაძლებლობების შესახებ ინფორმაციის მიწოდება.

თეგეტა აკადემიის კურსის მონაწილეებისთვის შეხვედრა პროფესიული განათლებისა და გარემოსდაცვითი ცნობიერების ერთმანეთთან დაკავშირების შესაძლებლობაც იყო. განსაკუთრებით მნიშვნელოვანია, რომ ავტომობილების სფეროში მომავალი პროფესიონალები უკვე სწავლების ეტაპზე გაეცნონ იმ პასუხისმგებლობას, რომელიც მათ მომავალ საქმიანობასა და გარემოსდაცვით საკითხებს შორის არსებობს.

თეგეტა გრინ პლანეტი მომავალშიც გააგრძელებს ახალგაზრდებთან, საგანმანათლებლო დაწესებულებებსა და კერძო სექტორთან თანამშრომლობას, რათა სპეციფიკური ნარჩენების მართვის შესახებ ცოდნა და პასუხისმგებლიანი პრაქტიკა კიდევ უფრო ფართოდ გავრცელდეს.